Цæрæнбонты дæхи къуыммæ фæбæл æмæ дæ закъонхалджытæ сæхæдæг къуыммæ батæрæнт. Ахæм цаутæ сарæх сты. Йæхи пъланмæ гæсгæ кæнæ асламдæрæй фатер балхæнын кæй фæнды, уый йæ ныфс бадары алыхуызон аразæг компанитыл. Фæлæ цы тас хæссынц æмæ цæмæ æнхъæлмæ кæсдзынæ дæ фæрæзтæ бавæргæйæ, уый базыдта не сфæлдыстадон къорд.
5 адæймагæн -12 квадратон метры. Кортиаты бинонтæ æмдзæрæны ахæм уавæрты цæрынц. Бирæ азты фатер балхæнынæн æхца æмбырд кæнынц. Растддæр зæгъгæйæ, æмбырд кодтой, цалынмæ арæзтадон компанийыл нæ баууæндыдысты æмæ сын се хца сæ фыццаг не скодтой, уæдмæ.
18 микрорайоны хæдзар амадтой 170 фатерæн. Цæрæнбынат балхæнын кæй фæндыд, уыдонæй æхца рагацау сæмбырд кодтой. Раст зæгъгæйæ, бæстыхай аразын дæр райдыдтой. Компани «ТулузаИнтерСервис»-æн афæдз æмæ рдæгмæ бантыст хæдзары цæджындзтæ æмæ йæ фидар хæйттæ саразын. Фæлæ уыдон дæр æрдæгмæ. Фæстæдæр компани фæкъуыввитт ис. Адæмы хца æрбасатар фесты.
Хъуыддаг афтæ ныууадзыныл адæм разы не сты. Цалдæр хатты митингтæ дæр арæзтой. Сæ курдиæттæ лæвæрдтой алыхуызон министрадттæм æмæ ведомствæтæм. Дыууæ къуырийы размæ та зындгонд адæмимæ рекламон фæйнæджытыл баныхæстой агитацион ныв «Баххуыс нын кæнут», зæгъгæ, ныхæстимæ.
Бæззаты Дмитрий — РЦИ-Аланийы арæзтады æмæ архитектурæйы министры хæдивæг :
«Сайд адæм æппæты фыццаг хъуамæ сæ курдиæттæ реестрмæ бадæттой, уымæн æмæ мах сайд адæмæй се ппæты нæ зонæм. Стæй нæ хъæуы, хæдзар кæронмæ самайынæн цас нæ фаг кæны, уый сбæрæг кæныны тыххæй сметæ саразын. Иртасæн куыстытæ дæр цæрджытæ сæхæдæг хъуамæ скæной».
Сайд адæмы фæнды ног аразæг компани ссарын. Домынц сæхицæн лæвар фатертæ, не `хцайæ, дам, æнæуый дæр æнæхай фестæм, зæгъгæ. Республикæйы æмæ архитектурæйы арæзтады министрады куыд æмбарын кæнынц, афтæмæй фарста ахæм хуызы алыг кæнæн дæр ис. Фæлæ сайд адæмы бахъæудзæн бирæ гæххæттытæ ссарын æмæ бацæттæ кæнын. Уый фæстæ министрады эксперттæ бацархайдзысты цыбыр рæстæгмæ ног арæзтадон компани ссарыныл. Цæттæгæнæн куыст та адæмы ныр райдайын хъæуы.
Пелиты Сабинæ, Ангелина Васильева, Гаглойты Сергей, Ирыстоны Хабæрттæ.
_
Мы рядом в:
vk.com/irystontv
instagram.com/irystontv
Telegram: t.me/irystontv
youtube.com/irystontv
twitter.com/irystontv
